03:04 pm
ڈالر کم ترین سطح پر آگیا

ڈالر کم ترین سطح پر آگیا

03:04 pm

کراچی (نیوز ڈیسک) انٹربینک مارکیٹ میں روپے کی قدر مستحکم ہو گئی جبکہ ڈالر چار ماہ کی کم ترین سطح پر آ گیا۔ تفصیلات کے مطابق کاروباری ہفتے کے تیسرے روز انٹر بینک میں روپے کی قدر میں استحکام دیکھا گیا ہے۔ ایکسچینج کمپنیز ایسوسی ایشن کے مطابق انٹر بینک میں ڈالر چار ماہ کی کم سطح 155.78 روپے میں فروخت ہورہا ہے۔گذشتہ روز اوپن مارکیٹ میں ڈالر 155.90 روپے میں فروخت ہوا جو کہ پیر کے روز 156 روپے میں دستیاب تھا۔ اسی طرح انٹر بینک میں ڈالر کی 155.85 روپے میں فروخت ہوا۔ واضح رہے کہ 2019ء میں ڈالر کی قیمت میں روپے کے مقابلے میں پیش رفت جاری رہی۔ جنوری میں ڈالر 138 روپے93 پیسے، فروری میں 138 روپے 90 پیسے اور مارچ میں 139 روپے10 پیسے پر ٹریڈ کررہا تھا۔اپریل 2019ء میں ڈالر چھلانگ لگا کر 141 روپے 50 پیسے پر آگیا۔مئی میں 151 روپے اور جون میں تاریخ کی بلند ترین
سطح 164روپے پر پہنچ گیا۔ جولائی 2019ء میں ڈالر کی اڑان رک گئی اور ڈالر کمی کے بعد انٹربینک میں 160 روپے اور اوپن مارکیٹ میں 161 روپے کا ہوگیا۔ اگست 2019ء میں روپے نے ڈالر کا جم کر مقابلہ کیا اور ڈالر 157.20 روپے تک پہنچ گیا۔ ستمبر 2019ء کے اختتام پر ڈالر کی قیمت میں مزید کمی واقع ہوئی اور یہ 156.40 روپے پر پہنچ گیا۔یہاں یہ بات قابل ذکر ہے کہ حال ہی میں فاریکس ایسوسی ایشن کے صدر ملک بوستان نے خوشخبری سناتے ہوئے کہا تھا کہ روپیہ بہت جلد ڈالر کے مقابلے میں 145 روپے تک آجائے گا۔رواں مالی سال کے آغاز پر روپے کی مسلسل گرتی ہوئی قیمت نے عوام کو پریشان کر کے رکھ دیا ہے لیکن اب پیسے کی قدر میں بتدریج بہتری آنے کا سلسلہ شروع ہو گیا ہے۔ اور اُمید کی جا رہی ہے کہ رواں مالی سال کے آئندہ آٹھ ماہ میں روپے کی قدر مزید بہتر ہو جائے گی۔

تازہ ترین خبریں