دفعہ 370 A کا خاتمہ بھارت کی تباہی کا موجب بن جائیگا ، توصیف اسلم مقبوضہ کشمیر کی خصوصی حیثیت ختم کر نا غیرقانونی اقدام ،ہرگز قابل برداشت نہیں سہنسہ ( نمائندہ خصوصی)حلقہ سہنسہ سرساوہ سے قانون ساز اسمبلی کے امید وار توصیف اسلم چوہدری نے کہا کہ مقبوضہ کشمیر کی خصوصی حیثیت ختم کر نا غیرقانونی اقدام ہے جسے کوئی بھی باضمیر انسان برداشت نہیں کر سکتا۔ انھوں نے کہا کہ دفعہ 370 A کا خاتمہ بھارت کی تباہی کا موجب بن جائے گا ۔ انڈیا نے شملہ معائدے کی خلاف ورزی ہی نہیں بلکہ اقوام متحدہ کی قرار دادوں سے انحراف کیا ہے ۔ مودی کشمیر میں خون کی ہولی کھیلنے جارہا ہے ۔ کشمیریوں کو اقلیت میں تبدیل کرنے کی بھارتی سازش اسرائیل طرز پر ہے آٹھ لاکھ فوج کشمیریوں کے جذبہ حب الوطنی کو دبانے میں ناکام ہوچکی ہے اب مود ی کے عزائم اور شرمناک چہرہ عیاں ہوگیا ہے ۔ نہ کشمیریوں کے حقوق پر ڈاکہ ڈالنے دیں گے اور نہ بھارت کو مقبوضہ کشمیر پر قبضہ کرنے دیں گے ۔ یہ نہ کوئی سرحدی تنازعہ ہے نہ علاقائی مسئلہ ہے بلکہ ڈیڑھ کروڑ عوام کی زندگی اور موت کا سوال ہے ۔آرٹیکل 35A کا استعمال کر نا ہندستان کی تباہی و بربادی کا سبب بن جائے گا۔ حکومت پاکستان قومی پالیسی تشکیل دے عالمی ضمیر جھنجوڑے اقوام متحدہ کو بے دار کر ے یورپی ممالک اور سلامتی کونسل کی حمائت حاصل کرے اور مودی کے عزائم کو ناکام بنانے کے لیے تمام تر توانائیاں وسائل اختیارات اور تعلقات استعمال کیے جائیں ۔ بھارت نے ہٹ دھرمی تشددانہ پالیسی غیر ذمہ دارانہ رویہ اور آرٹیکل 370 کے استعمال نے پوری دنیا میں نفرت بڑھائی ، مودی نے اپنے ہی آئین کی دھجیاں بکھیر دیں ۔