اس لئے معاملے کی معلومات رکھنے والے افراد نے نام ظاہر نہ کرنے کی شرط پر بتایا ہے کہ بلوچستان حکومت کے حکام نے نامور کاروباری شخصیات عارف حبیب اور محمد علی تابا سے ملاقات کی ہے جن کے متعلق خیال کیا جاتا ہے کہ وہ اس پروجیکٹ پر اپنی ایک ارب ڈالرز کی نقد رقم خرچ کرنا چاہتے ہیں صوبائی حکومت نے موقف دینے کی درخواست پر جواب نہیں دیا۔ جولائی میں ورلڈ بینک کی زیر قیادت ایک بین الاقوامی ٹریبونل نے پاکستان کو حکم دیا تھا کہ وہ بیریک گولڈ کارپوریشن اور اینٹوفاگسٹا پبلک لمیٹڈ کمپنی کو ہرجانے کی صورت میں 5.8 ارب ڈالرز ادا کرے کیونکہ پاکستان نے انہیں 2011ءمیں ریکو ڈک کی کان کنی کیلئے لائسنس دینے سے انکار کر دیا تھا۔ اگرچہ یہ فنڈز جمع کرنا مشکل کام ثابت ہو سکتا ہے کیونکہ پاکستان کی معاشی صورتحال کمزور ہے۔ ہرجانے کی رقم تقریباً اتنی ہی ہے جتنی آئی ایم ایف نے پاکستان کو رواں سال معاشی بحران سے بچنے کیلئے بیل آؤٹ پیکیج کی صورت میں (6 ارب ڈالرز) دی تھی۔ رواں ماہ انگریزی روزنامے ڈان کی خبر میں بتایا گیا تھا کہ وزیراعلیٰ بلوچستان نے کان کا قبضہ ترجیحی طور پر پاکستانی کمپنیوں کو دینے کا اظہار کیا ہے۔ جن کاروباری گروپس نے کان کنی کے اس پروجیکٹ میں دلچسپی کا اظہار کیا تھا ان میں لکی سیمنٹ لمیٹڈ کے مالک یونس برادرز گروپ، عارف حبیب گروپ، فاطمہ گروپ اور لبرٹی پاور ٹیک لمیٹڈ کے مالکان شامل ہیں۔ چاروں کی قیادت شمس الدین شیخ کر رہے ہیں جنہوں نے پہلی مرتبہ تھر سے کوئلہ نکالنے کیلئے گروپ آف کمپنیز تشکیل دیا تھا۔ تنازع پیدا ہونے سے قبل کرائی جانے والی ایک فزیبلٹی سے معلوم ہوتا ہے کہ ریکو ڈک تانبے اور سونے کے سب سے بڑی ذخائر پر مشتمل کان ہے جس میں مسلسل پچاس سال تک ہر سال دو لاکھ ٹن تانبہ اور ڈھائی لاکھ اونس سونا پیدا کرنے کی صلاحیت ہے۔ اس وقت کی جانے والی کیپیٹل سرمایہ کاری 3 ارب ڈالرز سے بڑھ جاتی۔