امریکی نشریاتی ادارے کے مطابق ہنٹ کاﺅنٹی شیرف دفترسے جاری بیان کے مطابق ڈپٹی چیف بڈی آکسفرڈ کا کہنا ہے کہ فائرنگ کا واقعہ یونیورسٹی کے کامرس کیمپس سے 24 کلومیٹر دور پیش آیا جہاں یونیورسٹی کی پارٹی ہورہی تھی‘ حملہ آور فائرنگ کے بعد فرار ہونے میں کامیاب ہوگیا‘غیر قانونی پارکنگ کی رپورٹس کا جواب دیتے ہوئے انہوں نے کہا کہ فائرنگ شرکا کے پہنچنے کے 15 منٹ بعد شروع ہوئی‘کاﺅنٹی کے ڈپٹی چیف شیرف نے بتایا کہ شرکا کے مطابق گولیوں ک آواز عمارت کے پیچھے سے آرہی تھی لیکن وہ یہ بتا سکے کہ آیا فائرنگ عمارت کے اندر یا باہر سے ہوئی. انہوں نے کہا کہ عمارت کے اندر دو افراد فائرنگ سے دم توڑ گئے تھے اور 14 افراد زخمی تھے جنہیں طبی امداد کے لیے ہسپتال منتقل کردیا گیا‘انہوں نے کہا کہ تاحال حملہ آور کے حوالے سے کچھ نہیں بتاسکتے لیکن افسران اس حوالے سے تفتیش میں مصروف ہیں. میڈیکل سٹی پلانو کی ترجمان ملیسا کا کہنا ہے کہ ہسپتال میں فائرنگ سے متاثرہ تین زخمیوں کو علاج کے لیے لایا گیا ہے اور تینوں کی حالت تشویش ناک ہے‘آکسفرڈ نے زخمیوں کی حالت کے بارے میں تفصیلات نہیں دی جبکہ ہسپتال جائے وقو سے 80 کلومیٹر کے فاصلے پر واقع ہے.یونیورسٹی انتظامیہ کا کہنا ہے کہ یہ طلبہ کی پارٹی تھی جس کا انتظام یونیورسٹی کی جانب سے نہیں کیا گیا تھا جہاں یونیورسٹی سے فارغ التحصیل طلبہ بھی شریک تھے‘ڈپٹی چیف پولیس نے بتایا کہ افسران کے مطابق پارٹی میں جب فائرنگ ہوئی تو اس وقت وہاں پر کم ازکم 750 افراد موجود تھے. انہوں نے کہا کہ جیسے تفتیش آگے بڑھے گی اور مزید معلومات حاصل ہوں گی تو تفصیلات جاری کردی جائیں گی‘امریکا میں اس سے قبل تعلیمی اداروں میں بھی فائرنگ کے واقعات پیش آتے رہے ہیں جہاں پاکستانی بچوں سمیت اسکول کے کئی طلبہ جان سے ہاتھ دھو چکے ہیں.مئی 2018 میں امریکی ریاست ٹیکساس میں ہی ایک ہائی سکول میں مسلح شخص کی فائرنگ سے پاکستانی طالبہ سبیکا عزیز شیخ سمیت 10 طالب علم ہلاک ہوگئے تھے‘سبیکا عزیز شیخ کینیڈی لوگر یوتھ ایکسچینج پروگرام کے تحت امریکا میں تعلیم حاصل کرنے گئی تھیں. 2018 کے اوائل میں فلوریڈا کی ہائی سکول میں فائرنگ سے 17 طلبہ ہلاک ہوئے تھے، جس کے بعد ملک بھر میں ”گن کنٹرول“ کی حمایت میں بڑے پیمانے پر مظاہرے بھی ہوئے تھے.خیال رہے کہ امریکا میں فائرنگ کے واقعات کی تعداد تشویش ناک حد تک زیادہ ہے جس کے باعث انسانی حقوق کی تنظیمیں اور سماجی کارکنان شہریوں کے پاس اسلحہ نہ ہونے کی پابندی عائد کرنے کا بھی مطالبہ کرتے ہیں‘یکم ستمبر کو ٹیکساس میں ہی فائرنگ کے نتیجے میں 5 افراد ہلاک جبکہ 3 پولیس اہلکاروں سمیت 21 افراد زخمی ہوگئے تھے. قبل ازیں 4 اگست کو ٹیکساس اور اوہائیو میں فائرنگ کے 2 مختلف واقعات پیش آئے تھے جس کے نتیجے میں خاصا جانی نقصان ہوا‘ٹیکساس کے شاپنگ مال میں ہونے والی فائرنگ سے 20 افراد ہلاک جبکہ اوہائیو کی سڑک پر فائرنگ سے 9 افراد اپنی جان سے ہاتھ دھو بیٹھے تھے.