05:53 pm
 آرمی چیف کی تقرری میں وزیراعظم عمران خان نے نااہلی کی تمام حدیں پھلانک دی ہیں ،لیاقت بلوچ

آرمی چیف کی تقرری میں وزیراعظم عمران خان نے نااہلی کی تمام حدیں پھلانک دی ہیں ،لیاقت بلوچ

05:53 pm

لاہور (آن لائن)نائب امیر جماعت اسلامی پاکستان لیاقت بلوچ نے آرمی چیف کی تقرری پر اپنے ردعمل میں کہاہے کہ آرمی چیف کی تقرری میں وزیراعظم عمران خان نے نااہلی کی تمام حدیں پھلانک دی ہیں ۔ ملک کے لیے مفید کام کو بھی غیر ذمہ داری کی وجہ سے مسخ کردیا ہے ۔ معاشی ، سماجی ، آئینی ، قانونی معاملات میں نااہلی کے ساتھ کوئی اقتدار چل نہیں سکتا ۔ عمران خان ناکامی تسلیم کریں اور اقتدار چھوڑ دیں ۔ صرف پارٹی سربراہی سنبھال لیں اس کھیل میں امپائر کو ہی بولڈ کردیا ہے
۔دریں اثنا لیاقت بلوچ نے دینی جماعتوں کے مرکز ی مشاورتی اجلاس سے خطاب اور صحافیوں سے گفتگو کرتے ہوئے کہاہے کہ پاکستان کے نظریاتی ، اقتصادی اور سلامتی کے بحرانوں کا علاج ریاست مدینہ کا نظام ہے ۔ بد دیانت ، نااہل اور غیر ذمہ دار حکومت کے ذریعے یہ خواب شرمندہ تعبیر نہیں ہوسکتا۔مقبوضہ کشمیر میں ظلم ، جبر اور تشدد کی ہر انتہا کشمیریوں سے آزادی اور حق خود ارادیت کا جذبہ نہیں چھین سکا ۔ مظلوم کشمیریوں کی مدد سے منہ موڑ کر عمران خان نے خود اپنے اور حکومت کے لیے مسائل پیدا کرلیے ہیں ۔ وقت ہاتھ سے نکل رہاہے ۔ کشمیر کے لیے عملی اقدامات کیے جائیں۔ لیاقت بلوچ نے کہاکہ وزیراعظم نے او آئی سی کا نفرنس اور اقوام متحدہ جنرل اسمبلی خطاب میں درست موقف اختیار کیا لیکن اس کے بعد نہ فالو اپ ہے اور نہ ہی کوئی منصوبہ عمل ہے ۔ ناموس مصطفیٰؐ کے تحفظ کے لیے عالمی سطح کی قانون سازی کا لائحہ عمل بنایا جائے ۔ امریکہ ، یورپی اور پوری مغربی دنیا کو باور کرادیا جائے کہ مسلمان قرآن ، محمد ؐ ، شعائر اسلام اور عصمت انبیاء ؑ کے تحفظ پر کوئی کمپرومائز نہیں ہوسکتا۔

تازہ ترین خبریں