07:00 am
راشن کیلئے گورنر ہائوس پنجاب کے باہر جمع ہونیوالوںکے ہاتھ کچھ نہ آیا

راشن کیلئے گورنر ہائوس پنجاب کے باہر جمع ہونیوالوںکے ہاتھ کچھ نہ آیا

07:00 am



لاہور(نیوز ڈیسک)عالمی وبا کورونا وائرس کے پیش نظر ملک بھر میں لاک ڈاؤن کا سلسلہ جاری ہے جس کے باعث دہاڑی دار طبقہ اور نادار افراد ضروری کھانے پینے کی اشیاء سے محروم ہو گئے ہیں۔پاکستان کے مختلف شہروں میں مستحقین کے لیے راشن اور امدادی سامان تقسیم کیا جا رہا ہے، پنجاب میں بھی آج  مستحقین کی بڑی تعداد راشن لینے کے لیے گورنر ہاؤس پنجاب کے باہر پہنچ گئی۔
صوبہ پنجاب کے گورنر ہاؤس کے باہر راشن لینے آنے والے مستحقین کا کہنا تھا ہمیں کہا گیا تھا کہ صبح 8 بجے گورنر ہاؤس سے راشن ملے گا جس کے لیے ہم صبح 6 بجے سے گورنر ہاؤس کے باہر موجود ہیں لیکن کسی کو راشن نہیں ملا۔مستحقین کے مطابق گزشتہ روز قلعہ گوجر سنگھ میں ٹرک سے اعلان کیا گیا تھا کہ اتوار کو گورنر ہاؤس سے راشن ملے گا۔شہریوں نے میڈیا سے گفتگو میں حکومت سے شکوہ کرتے ہوئے بتایا کہ اب ہمیں کہا جا رہا ہے  مقامی پولیس اسٹیشنز کے باہر راشن ملے گا، ان حالات میں بچوں کا پیٹ پالنے کے لیے کہاں جائیں۔مستحقین کی جانب سے گورنر ہاؤس سے راشن نہ ملنے پر گورنر ہاؤس کے سامنے مال روڈ پر بھی احتجاج کیا گیا۔