رواں بجٹ میں 25سے زائد سروسز پر ٹیکس ریلیف دیا گیاتھا لاہور22 مئی:-وزیراعلیٰ پنجاب سردار عثمان بزدار کی زیر صدارت ریسورس موبلائزیشن کمیٹی کا اہم اجلاس منعقد ہوا،اجلاس میں صوبے کے وسائل میں اضافے کے لئے تجاویز کا جائزہ لیا گیا اور بی او آر، پی آر اے، ایکسائز ٹیکسیشن اینڈنارکوٹکس،ایریگیشن اور مائنز اینڈ منرل ڈیپارٹمنٹ کی طرف سے ریونیو وسائل میں اضافے کے لئے سفارشات پیش کی گئی-وزیراعلیٰ عثمان بزدارنے صوبائی وسائل میں اضافے کیلئے آؤٹ آف دی باکس حل کی ہدایت کی-وزیراعلیٰ عثمان بزدار نے عام آدمی پر معاشی بوجھ کم کرنے کے لئے جامع اور پائیدار اقدامات کا حکم دیااور وزیراعلیٰ نے بجٹ میں کورونا ٹیکس ریلیف قابل عمل انداز میں جاری رکھنے کا حکم بھی دیا-اجلاس میں اگلے مالی سال کے بجٹ کے لئے 50ارب روپے سے زائد کورونا ٹیکس ریلیف کا اصولی فیصلہ کیا گیا-رواں بجٹ میں 25سے زائد سروسز پر ٹیکس ریلیف دیا گیا تھا-وزیراعلیٰ عثمان بزدار نے نئے مالی سال کے بجٹ میں مخصوص سروسز پر ٹیکس کی شرح مزید کم کرنے کی ہدایت کرتے ہوئے کہاہے کہ غریب اور لوئر مڈل کلاس کو ریلیف فراہم کیا جائیگا- وزیراعلیٰ عثمان بزدار نے کہاکہ پاکستان تحریک انصاف کی حکومت عوام دوست اور غریب پرور پالیسیاں بنا رہی ہے- کم ازکم ٹیکسز کے ساتھ زیادہ سے زیادہ سہولتیں فراہم کرنے کی پالیسی پر عمل کیاجائے-روایتی طریقہ کار کی بجائے اچھوتے انداز میں وسائل میں اضافے پر توجہ دی جائے-عام آدمی کو ریلیف دینا ہمارا مشن ہے-اجلاس میں پنجاب ریونیو اتھارٹی، بورڈ آف ریونیواور ایریگیشن ڈیپارٹمنٹ، ایکسائز اینڈ ٹیکسیشن اینڈ نارکوٹیکس کنٹرول اور مائنز اینڈ منرل ڈیپارٹمنٹ کے سربراہان نے بریفنگ دی-صوبائی وزراء ہاشم جواں بخت،سید حسین جہانیاں گردیزی، سردار محسن لغاری،میاں اسلم اقبال، ملک محمد انور، مراد راس، چیف سیکرٹری، سینئرممبر بورڈ آف ریونیو، پرنسپل سیکرٹری وزیراعلیٰ او رمتعلقہ محکموں کے سیکرٹریز اجلاس میں شریک تھے