آج عالم اسلام علمی پسماندگی کے باعث مغرب کا دست نگر بن چکا ہے ، استعماری قوتیں عالم اسلام کے وسائل کو نگلتی چلی جارہی ہیں امت محمدی تقسیم در تقسیم کا شکار ہو کر دشمنوں کیلئے تر نوالہ بنتی جارہی ہے اور کوئی امت مسلمہ کا پرسان حال نہیں لہذا مصائب کے گرداب سے نجات کیلئے عالم اسلام کو قرآن و اہلبیت ؑ سے ٹوٹا رشتہ دوبارہ جوڑنا ہوگا۔انہوں نے کہا کہ خانوادہ اہلبیتؑ کے آفتاب و مہتاب حضرت امام جعفر صادق ؑ کے احسانات آج تک پوری دنیا پر سایہ فگن ہیں جب یورپ تاریکی میں ڈوبا ہوا تھا یونان و روم کی تہذیبیں دم توڑ چکی تھیں امام جعفر صادق علیہ السلام نے رسول خداؐ کی حقیقی تعلیمات اور اسلام کے سچے اعتقادات واضح کئے اور اسلام کے پیغام کوآفات و حوادث سے محفوظ رکھا،ایسے اصول پیش کئے جو اسلامی قانون کا منبع قرار پائے ،آج بھی فقہ اور اصول فقہ میں ڈیڑھ سو سے زیادہ ایسے قواعد موجود ہیں جن سے ہزاروں فقہی مسائل کا استخراج کیا جاتا ہے ان میں زیادہ تر قواعد ایسے ہیں جو امام جعفر صادقؑ کے ان ارشادات سے ماخوذ ہیں جن کا سلسلہ رسول خداؐ صلی اللہ علیہ وآلہ وسلم تک پہنچتا ہے ۔ آپ نے فقہ و حدیث کے ساتھ فزکس کیمسٹری فلکیات طب میں ہزاروں شاگردوں کی تربیت کی جنہوں نے ایسی کتب تحریر فرمائیں جو آج کی جدید سائنس کی بنیاد قرار پائیں۔ انہوں نے کہاکہ حضرت امام جعفر صادق ؑ نے مدینہ منورہ میںجس یونیورسٹی کی بنا رکھی اس میں ہزاروں کی تعداد میں تشنگان علم، مختلف علوم سے سیراب ہوئے اور مدینۃ النبی ؐ ویسے ہی انوار کا مرکز بن گیا جیسے حیات مصطفویؐ میں تھا اور پوری دنیا آپ کو صادق آل محمد ؐ کے لقب سے پکارنے لگی۔ٹی این ایف جے کے رہنمانے کہا کہ اہلسنت کے امام اعظم امام ابو حنیفہؒ کا قول تاریخ پر ثبت ہے کہ میں نے امام جعفر بن محمد(امام جعفر صادق ؑ) سے بڑا فقیہ نہیں دیکھا بے شک آپ امت محمدیؐ میں سب سے زیادہ علم و فضل کے مالک ہیں۔انہوں نے کہا کہ امت مسلمہ کو درپیش سیاسی ، سماجی ، علمی ، معاشی مسائل کا حل قرآن اور سیرت محمد و آل محمد ؐ میں پوشیدہ ہے فرمان نبوی ؐ کی روشنی میں ہدایت کے دونوں سرچشمے حوض کوثر تک ساتھ ساتھ رہیں گے لہذاعشرہ صادق آل محمد میں اسلامیان عالم بالخصوص قرآن و اہلبیت سے وابستگی کا عملی ثبوت دیں اور اس عہد کا اعادہ کریں کہ علمی میدانوں میں اپنا کھویا مقام حاصل کریں گے اور رشتہ اخوت کو دوبارہ استوار کرکے اغیار کی سازشوں کو ہمیشہ کیلئے ناکام بنا دیں گے ۔ درایں اثناء عشرہ صادق آل محمدؐ کے پروگراموں کومنظم کرنے کیلئے ڈاکٹرایس زمان کوکنوینر ، پروفسیراے آرکیانی کوڈپٹی کنوینر جبکہ سیدثمرالحسن نقوی کو ٹی این ایف جے کی آرگنائزنگ کمیٹی کاسیکرٹری نامزدکیاگیاہے۔