کے مطابق پنجاب کے صوبائی دارالحکومت لاہور میں ہفتے کے روز ہونے والی موسلادھار بارش کے بعد مزید بارش ہونے کی پیشن گوئی کی گئی ہے۔ بتایا گیا ہے کہ لاہور میں مون سون بارشوں کے نئے سلسلے کا آغاز ہو گیا، شہر میں طوفانی بارشوں کا سسٹم داخل ہونے کا امکان ہے۔ مزید بارش کے باعث لاہور شہر میں اربن فلڈنگ کی صورتحال پیدا ہونے کا خدشہ ہے، اسی باعث تمام متعلقہ حکام الرٹ پر ہیں۔ اس حوالے سے واسا حکام کا کہنا ہے کہ طوفانی بارش ہونے کی صورت میں سیلانی پانی کو لاہور شہر سے نکال کر راوی دریا تک پہنچانے کے انتظامات مکمل کر لیے گئے ہیں۔ واضح رہے کہ ہفتے کے روز لاہور میں وقفے وقفے سے موسلا دھار بارش ہوئی جس سے جل تھل ایک ہو گیا ۔ شدید بارش سے جیل روڈ، شادمان ،جوہر ٹائون، مال روڈ، سمن آباد، گلشن روای،گلبرگ ، گڑھی شاہو، محمد نگر، شاد باغ ، ٹھنڈی کھوئی سمیت مختلف علاقوں میں نشیبی علاقے زیر آب آ گئے ۔ کئی مقامات پر شاہراہوں بھی پانی میں ڈوب گئیں جس سے شہریوں کی گاڑیاں او رموٹر سائیکلیں بند ہونے سے گاڑیوں کی لمبی قطاریں لگی رہیں جبکہ ٹریفک بھی سست روی کا شکار رہی ۔ بتایا گیا ہے کہ کچھ دیر کی بارش نے سروسز ہسپتال کو بھی پانی سے بھر دیا، سروس ہسپتال کے تہہ خانے میں پانی داخل ہوگیا جبکہ ہسپتال کی پارکنگ بھی تالاب کا منظر پیش کرتی رہی۔ بارش سے لیسکو کا ترسیلی نظام بھی بری طرح متاثرہوا ،درجنوں فیڈرز ٹرپ کر گئے جس سے متعدد علاقوںمیں گھنٹوں بجلی بند رہی ۔محکمہ موسمیات کے مطابق مون سون کا اگلا سپیل اگست میں پنجاب کا رخ کرے گا، اس سپیل میں اچھی بارشیں ہوں گی۔ دوسری جانب وزیراعلیٰ پنجاب سردار عثمان بزدار نے لاہور ، فیصل آباد اور دیگر شہروں میں بارشوں کے باعث نشیبی علاقوں سے نکاسی آب کے کام کو جلد مکمل کرنے کا حکم دیا ہے۔ وزیراعلیٰ عثمان بزدار نے اس ضمن میں متعلقہ ڈویژن کے کمشنرز اور واسا حکام کو ہدایات جاری کرتے ہوئے کہا کہ نشیبی علاقوں سے نکاسی آب کیلئے تما م ضروری وسائل بروئے کار لائے جائیں اور ضروری مشینری کے ذریعے نکاسی آب کو کم سے کم وقت میں یقینی بنایا جائے۔ انہوں نے کہا کہ واسا حکام اور انتظامی افسران نکاسی آب کے کام کو اپنی نگرانی میں مکمل کرائیں۔ پانی نکالنے کے لئے وضع کردہ پلان پر عملدرآمد یقینی بنایا جائے اور موثر ٹریفک مینجمنٹ کے ذریعے ٹریفک کو رواں دواں رکھا جائے۔شہریوں کو ٹریفک کی مشکلات کا سامنا نہیں ہونا چاہیئے۔ وزیراعلیٰ عثمان بزدار نے ہدایت کی کہ نکاسی آب کو ٹائم لائن کے اندر مکمل کرکے رپورٹ پیش کی جائے۔