انصاری نے ساتھیوں سمیت پاکستان مسلم لیگ(ن) میں دوبارہ واپسی کا اعلان کیا ہے ، رکن پنجاب اسمبلی رانا مشہود احمد کے ہمراہ پریس کانفرنس سے خطاب کرتے ہوئے انصاری برادران نے کہا کہ پاکستان مسلم لیگ (ن)ہماری اپنی جماعت ہے اور ہم اپنی جماعت میں واپس آگئے ہیں اور ہمیں مسلم لیگ (ن)کے قائدین پر مکمل اعتماد ہے۔انہوں نے کہا کہ چھوٹے موٹے اختلافات ہر گھر میں ہو جاتے ہیں لیکن ہماری وابستگی (ن)لیگ کے ساتھ ہے اور ہمیشہ رہے گی۔اس موقع پر رانا مشہود نے اس موقع پر کہا کہ انصاری برادران کی واپسی کا خیر مقدم کرتے ہیں۔اور یہ ہمارے اپنے گھر کا معاملہ تھا جسے خوش اسلوبی سے حل کر لیا گیا ہے۔انہوں نے کہا کہ مولانا غیاث الدین اور اشرف انصاری کے بعد دیگر ساتھی بھی پارٹی میں واپس آرہے ہیں اور ہمارے دروازے ہمارے ساتھیوں کے لیے کھلے ہیں۔خیال رہے کہ مسلم لیگ (ن) کے ٹکٹ پر ایم پی اے منتخب ہونے والے اشرف انصاری ماضی میں لیگی قیادت سے اختلافات کا برملا اظہار کر چکے ہیں ۔ دو فروری 2021 کو اپنے بیان میں اشرف انصاری نے کہا تھا کہ نوازشریف نے ثابت کیاوہ قیادت کرنے کے اہل نہیں رہے ، نوازشریف اچھی قیادت کیلئے راستہ چھوڑ دیں قوم کا وقت ضائع نہ کریں ،ملک اورپارٹی پر آپ جیسی قیادت کو مزید قبضہ نہیں کرنے دینگے۔لاہور میں پریس کانفرنس کرتے ہوئے اشرف انصاری نے کہاکہ اختلاف رائے جمہوریت کا حسن ہے تو سب کیلئے ہے،ذاتی مفادات پر 35 سال کی باتیں بھول کر پیپلزپارٹی کیساتھ شیروشکر ہوگئے،ہماری نیت میں کھوٹ ہوتا تو چھپ کر ملاقاتیں کرتے،انہوں نے کہاکہ مخصوص لابی پارٹی پر قابض ہے یہ بات مجھے نہیں آتی تھی ، ملک دشمن قوتیں ملک کے اندر اور باہربھی ہیں ،نوازشریف کب تک ملک اورقوم کی آنکھوں میں دھول جھونکیں گے،ملک و قوم کو اپنے مفادات کیلئے استعمال کررہے ہیں ،ہم نے ملک اورپارٹی کیلئے اپنا خون دیا ہے،انہوں نے کہاکہ کھوکھرپیلس ناجائز گرا ہے تو عدالت جائیں ۔اس سے قبل 15 اکتوبر 2020 کو اشرف انصاری کے بھائی یونس انصاری نے الزام لگایا تھا کہ ان کےبھائی کو پیسوں کےعوض ٹکٹ دی گئی،ہمارا حساب کلیئر کر دیں ہم ٹکٹ اُن کے منہ پر ماردیں گے، مسلم لیگ(ن)اور گوجرانوالہ کی قیادت کاالٹرا ساؤنڈ کرائیں اِن کے اندرسے سارا مال انصاری برادران کا نکلے گا۔یونس انصاری نے الزام عائد کیا تھا کہ ان کے بھائی اشرف انصاری کو پیسوں کے عوض2018 کے انتخابات میں ٹکٹ دی گئی، یں قرآن پر ہاتھ رکھ کر کہتا ہوں ہم نے مسلم لیگ (ن)کا ٹکٹ خریدا تھا۔