سنیئر صحافی ارشد شریف کی والدہ کا بیان سامنے آ گیا۔ارشد شریف کے قتل کا مقدمہ درج کرنے کے عدالتی حکم کے بعد صحافی کی والدہ نے ردِعمل دیتے ہوئے کہا ہے کہ میرا بیٹا قتل ہوا ہے،ایف آئی آر میں درج کراؤں گی۔ ارشد شریف کی والدہ نے مطالبہ کرتے ہوئے کہا کہ حکومت میری مدعیت میں بیٹے کے قتل کی ایف آئی آر درج کرے۔ سپریم کورٹ نے آج شام تک ارشد شریف کے قتل کا مقدمہ درج کرنے کا حکم دے رکھا ہے۔ قبل ازیں سپریم کورٹ میں ارشد شریف قتل کیس ازخود نوٹس پر سماعت ہوئی،چیف جسٹس عمر عطا بندیال کی سربراہی میں 5 رکنی بینچ نے سماعت کی۔دورانِ سماعت چیف جسٹس نے اٹارنی جنرل سے مکالمے میں کہا ایک فیکٹ فائنڈنگ کمیٹی بنی تھی جو واپس بھی آگئی۔ معاملے پر ارشد شریف کی والدہ کی چٹھی بھی آئی۔چیف جسٹس نے ریمارکس دئیے کہ ہماری معلومات کے مطابق کیس میں کوئی ایف آئی آر پاکستان اور کینیا میں درج نہیں کی گئیں۔چیف جسٹس نے استفسار کیا کہ بتائیں کہ ایف آئی آر کیوں نہیں درج کی گئی؟ عدالت نے استفسار کیا ایک رپورٹ وزارت کی جانب سے آنی تھی وہ ابھی تک کیوں نہیں آئی؟۔ ایڈیشنل اٹارنی جنرل نے عدالت کو بتایا کہ ہمیں ایک رپورٹ ویک اینڈ پر ملی جو ہم عدالت میں جمع کرائیں گے۔ وزیر داخلہ رانا ثناء اللہ فیصل آباد میں تھے ان کے دیکھنے کے بعد جمع کرائیں گے۔چیف جسٹس نے استفسار کیا کہ بیوروکریٹک کے معاملات کیوں سامنے لارہے ہیں؟۔ ہم وزیر داخلہ رانا ثنااللہ کو بلا لیتے ہیں۔چیف جسٹس نے بتایا کینیا میں بہت پاکستانی ہیں ، میں بھی ایک بار وہاں گیا ہوں۔ ایڈیشنل جنرل نے عدالت سے استدعا کی وزیر اعظم شہبازشریف کو رپورٹ کا جائزہ لینے دیں۔سماعت کے دوران جسٹس اعجازالاحسن نے استفسار کیا کہ رپورٹ میں ایسا کیا ہے جو سپریم کورٹ میں جمع نہیں کرائی جا رہی ہے؟۔اس کا مطلب کے وزیر داخلہ کو رپورٹ پسند آئی تو پھر جمع کرائیں گے۔