گلگت بلتستان کے وزیر اعلیٰ خالد خورشید نے گلگت بلتستان کے آئینی مسائل اور گندم کی قیمت کے تعین اور فراہمی کے حوالہ سے باہمی مشاورت سے لائحہ عمل ترتیب دینے پر اتفاق کیا ہے۔ بدھ کو جاری بیان کے مطابق یہ اتفاق رائے وزیراعظم کے مشیر برائے امور کشمیر و گلگت بلتستان قمر زمان کائرہ سے گلگت بلتستان کے وزیر اعلیٰ خالد خورشید کے درمیان ملاقات میں طے پایا جس میں گلگت بلتستان میں سیکورٹی صورتحال، ترقیاتی منصوبوں، بجٹ ایشوز اور گندم سپلائی کے حوالہ سے تفصیلی تبادلہ خیال کیا گیا۔ اس موقع پر گفتگو کرتے ہوئے قمر زمان کائرہ نے کہا کہ گلگت بلتستان میں تنخواہوں، ترقیاتی منصوبوں اور گندم فراہمی کے حوا لے سے وزیراعظم سے ملاقات کی ہے ، وزیراعظم نے گلگت بلتستان کے مسائل کو ترجیحی بنیادوں پر حل کرنے کی ہدایات جاری کی ہیں۔ انہوں نے کہا کہ کسی بھی قسم کی سیاسی وابستگی سے بالاتر ہو کر گلگت بلتستان کے مسائل کا حل جاری رکھیں گے، معاشی چیلنج کے حوالہ سے پورے پاکستان کو دشواری کا سامنا ہے ، گلگت بلتستان کے معاشی مسائل کے حل کے لئے متعلقہ فورمز سے رابطہ کر کے ان کا حل تلاش کریں گے۔ انہوں نے کہا کہ گزشتہ سال تمام صوبوں کے بجٹ پر کٹ لگائے گئےلیکن گلگت بلتستان کے سالانہ بجٹ کو برقرار رکھا گیا۔ ملاقات میں گندم کی فراہمی اور قیمتوں کے حوالے سے بھی تفصیلی تبادلہ خیال کیا گیا۔ ملاقات میں گندم کی قیمت کے تعین اور فراہمی کے حوالے تمام سیاسی جماعتوں کی باہمی مشاورت سے لائحہ عمل ترتیب دینے پر اتفاق بھی ہوا۔ وزیراعلیٰ گلگت بلتستان خالد خورشید نے کہا کہ پی ایس ڈی پی منصوبوں، اے ڈی پی پراجیکٹس اور تنخواہوں کے حوالہ سے بجٹ مشکلات کا سامنا ہے۔ انہوں نے کہا کہ تعلیم ، صحت اور زراعت کے شعبوں میں اصلاحات متعارف کرا رہے ہیں ۔ ملاقات میں گلگت بلتستان کے2018 اور 2019 کے جی بی آرڈرز اور اس سلسلے میں سپریم کورٹ میں کیس کے حوالہ سے بھی بات چیت کی گئی۔ گلگت بلتستان کے آئینی ایشوز کے حوالے سے باہمی مشاورت پر بھی اتفاق بھی کیا گیا۔ قمر زمان کائرہ نے وزارت کی جانب سے گلگت بلتستان کی ہر قسم کی معاونت کی یقین دہانی کرائی اور کہا کہ صوبائی حکومت اور وزارت میں باہمی رابطوں کو مزید بہتر بنایا جائے گا۔