06:53 am
بابر اعظم ہماری نظر میں مستقبل کے کپتان ہیں: چیئرمین پی سی بی

بابر اعظم ہماری نظر میں مستقبل کے کپتان ہیں: چیئرمین پی سی بی

06:53 am

لاہور:چیئرمین پی سی بی احسان مانی نے کہا ہے کہ بابر اعظم ہماری نظر میں مستقبل کے کپتان ہیں۔ احسان مانی نے کہا کہ سرفراز احمد کی موجودگی میں بابر اعظم کو مستقبل کے ٹیسٹ کپتان کیلئے تیار کیا جارہا ہے۔ انہوں نے مزید بتایا کہ سری لنکا کی ٹی ٹوئنٹی سیریز کے بعد اور آسٹریلیا کی ٹیسٹ سیریز سے قبل پی سی بی نے کرکٹ کمیٹی کا اجلاس بلانے کا فیصلہ کیا ہے۔جبکہ انہوں نے سرفرازاحمد کو فوری طور پر کپتانی سے ہٹانے کی خبروں کی بھی تردید کی ہے۔ انہوں نے کہا کہ ہوم سیریز کے بعد پی سی بی کرکٹ کمیٹی سے ٹیسٹ کپتان کے بارے میں رائے لی جائے گی جب ان کی رائے اور تجویز آئیں گی تو میں چیئرمین کی حیثیت سے اپنا صوابدیدی اختیار استعمال کروں گا، اس وقت میڈیا کپتان کے حوالے سے غیر ضروری بحث میں الجھا ہوا ہے۔
 
واضح رہے کہ پی سی بی کے آئین کے مطابق چیئرمین احسان مانی کے پاس کپتان کی تقرری کا اختیار ہے، کرکٹ کمیٹی کے سربراہ پی سی بی کے سی ای او وسیم خان ہیں جبکہ مصباح الحق کے استعفیٰ کے بعد اراکین میں وسیم اکرم اور عروج ممتاز شامل ہیں۔ خیال رہے کہ ورلڈکپ کے بعد سرفراز احمد کی کپتانی کے بارے میں افواہیں اڑ رہی تھیں اور یہ خیال ظاہر کیا جا رہا تھا کہ قیادت میں تبدیلی آسکتی ہے تاہم پاکستان کرکٹ بورڈ کے تازہ ترین فیصلے سے ان قیاس آرائیوں کا خاتمہ ہو گیا ہے۔یاد رہے کہ اس سے قبل کہا جا رہا تھا کہ سرفراز احمد کو کپتانی سے ہٹائے جانے کا فیصلہ کرلیا گیا ہے اور یہ خبر ایسے وقت میں سامنے آئی ہے جب پاکستان کرکٹ ٹیم سری لنکا کے خلاف ہوم سیریز میں مصروف ہے، ٹی ٹوئنٹی اور ایک روزہ ٹیم کی قیادت سرفراز احمد کررہے ہیں اور پاکستان نے ون ڈے سیریز کا ایک میچ جیت لیا ہے، ایک میچ بارش کی وجہ سے منسوخ ہو گیا تھا جبکہ 1 میچ ابھی ہونا باقی ہے۔

تازہ ترین خبریں