خوف زدہ ریاض اجڑتا رہا۔ امریکی تجوریاں مالدار بنتی رہیں۔ القاعدہ کا کھیل جاری رہا۔ انقلاب ایران شاہ دشمن تھا تو امریکہ کو بزرگ شیطان کا نعرہ لگاتا تھا۔ شروع میں امریکہ کافی پریشان اور ذلیل ہوا انقلاب کے ہاتھوں کیونکہ آسمانی قوتیں امریکہ کے مدمقابل انقلابی روح کی مددگار تھیں۔ پھر خوف کا نیا کھیل یہ کھیلا گیا کہ صدام حسین اور ایران میں لڑائی کروائی گئی۔ یوں مشرق وسطیٰ میں خوف اور جنگ کی یہ اسٹرٹیجک حکمت عملی کامیاب رہی۔ امریکی حکمت عملی میں عربوں کی دولت آٹھ سالہ جنگ میں خرچ ہوتی رہی اور ایرانی قوم کے مرد ذبح ہوتے رہے۔ مگر میں سلام پیش کرتا ہوں بوریہ نشین امام خمینی کو کہ اس نے سرنڈر سے انکار کئے رکھا۔ دونوں عراق و ایران سے فاتح تو کوئی نہیں تھا مگر ’’اجڑ‘‘ دونوں ہی گئے۔ انقلاب ایرانی بظاہر امریکہ کے مخالف میں ظہور میں آیا تھا مگر اس مخالف انقلاب کو عربوں پر کاٹھی ڈالنے کے لئے استعمال کرنے کی ’’ترکیب‘‘ بھی سوجھی گئی اور عرب بادشاہتوں کے جغرافیے، سیاست، سیادت، حکمرانی کو تبدیل کرنے کے لئے ایرانی انقلاب کو خوب استعمال کیاگیا اور عربوں کو ایرانی فتوحات سے محفوظ رکھنے کے لئے خوب لوٹا جاتا رہا۔ پھر اچانک ’’عرب بہار‘‘ کی آندھی بھی چلا دی گئی۔ تیونس سے مصر تک اور یمن تک یہ امریکی بالواسطہ آندھی مدو جذر پیدا کرتی رہی۔ یمن میں یہ جو طویل مدتی جنگ و جدل ہے یہ اسی امریکی و مغربی عرب بہار کے اثرات ہیں مصر میں حسنی مبارک کی رخصتی، جنرل السیسی کی آمد اسی امریکی عرب بہار کی نعمت ہے۔ پھر نیا کھیل کھیلا گیا، ایران کو ساتھ ملا کر، نیا کھیل افغانستان، عراق میں کھیلا گیا۔ کسی زمانے میں صدام کے عراق کو ایران پر حملہ آور بنایا گیا تھا، اب کی بار امریکہ و برطانیہ عراقی عوام کو صدام حسین سے نجات دلانے کے لئے خود حملہ آور ہوگئے۔ الزام ایٹمی ہتھیاروں کی موجودگی کا تھا اور صدام حسین کا فکری تعلق اسامہ اور القاعدہ سے بتایا جاتا رہا۔ امریکی ’’جھوٹ‘‘ کو استعمال کرنے کی اسٹریٹجک منصوبہ بندی کس انداز میں فاتح رہی؟ صدام حسین ختم ہوگیا اور کمال ہوشیاری سے نئے ہمرکاب ایران کو عراق میں شریک سفر بنا لیا گیا۔ ایران کو مادی سے زیادہ جغرافیہ ’’سپرمیسی‘‘ کی خواہش تھی وہ اسے دے دی گئی اور عراق سے شام و لبنان و یمن تک رسائی تو ایران کو مل گئی مگر کس قدر چابلوسی سے صدر بارک اوبامہ الازہر الشریف گئے۔ شاہ عبداللہ آل سعود کو کس مکاری سے جھک کر احترام پیش کیا۔ بغل میں عرب دشمن چھری اور امریکی زبان پر رام رام اور خود عراق و شام کی معدنیات امریکہ آسانی سے لوٹتا رہا ہے۔ شاہ عبداللہ کو سلام و عقیدت کہ وہ سارا امریکی کھیل بھانپ گئے، انہوں نے مشرق وسطیٰ میں امریکہ کو نکیل ڈالنے کے لئے صدر پیوٹن کے روس اور صدر شی کے چین اور مشرق میں بھارت ، پاکستان ، انڈونیشیا و ملائیشیاء سے تعلقات قائم کرلئے۔ شاہ سلمان اور ولی عہد شروع میں ایرانی دشمنی میں مبتلا ہوئے، ردعمل دیتے رہے۔ ایران مخالف رویہ اپنا لیا مگر دیکھا کہ اس روئیے میں جہاں صدر ٹرمپ تو ولی عہد کے ساتھ تھے مگر امریکی ڈیپ اسٹیٹس سعودیہ مخالف اور محمد بن سلمان مخالف، محمد بن سلمان نے امریکی ڈیپ اسٹیٹس کے صدر جوبائیڈن کو جواب آن غزل روسی صدر سے تعلقات، تیل اوپیک سیاست میں اینٹی امریکہ کردار پیش کیا۔ چین سے تعلقات کو گہرائی مزید دے دی، ایران نے امریکہ سے تمام سیاسی و جغرافیائی ’’سپرمیسی‘‘ کے فوائد سمیٹتے ہوئے چین اور روس سے ہمہ گیر تعلقات اپنالئے۔ میں دونوں اطراف سمیت محمد بن سلمان اور محمد بن زاید النھیان کو بھی خراج عقیدت پیش کرتا ہوں۔ درمیان میں قطر سے امریکی اذہان نے ایم بی ایس اور ایم بی زیڈ کی لڑائی کروا دی۔ نقصان میں سعودیہ و امارات و قطر رہے۔ فوائد صرف امریکہ نے سمیٹے، جب امارات و سعودیہ کو ’’کھیل‘‘ کی سمجھ آگئی تو قطر سے دشمنی محبت میں تبدیل ہوگئی تو امریکی کھیل کو ناکام ہونا پڑا۔ امریکی ’’تقسیم کرو اور حکومت کرو‘‘ کا کھیل اور ’’خوف‘‘ مسلط کرکے فوائد سمیٹتے رہنے کا کھیل تہران کو سمجھ آچکا اور ریاض کو بھی چین جو ’’تقسیم کرو اور حکومت کرو‘‘ فارمولے سے بہت دور ہے اور مشرق وسطیٰ میں ہمہ گیر سفارتی سرگرمیاں رکھتا ہے۔ وہ آگے بڑھا، اس نے امریکی حکمت عملی، اسٹریٹجک، سیکورٹی، خوف مسلط کرنا، جھوٹ، مکر وفریب کو بطور ہتھیار استعمال کرنا، اپنا سفارتی ذہانت کا چینی ہتھیار بنا کر امریکہ کو اسٹریٹجک شکست دے دی ہے آج چین کے ہمراہ سعودیہ و ایران کھڑے ہیں۔ مگر یہ مفاہمت لازماً ناکام بنائی جائے گی۔ کیا ایرانی یمن میں پراکسی وار روک سکتے ہیں؟