ہمارے ملک میں تو غلط ملط طریقے پر ایک ایسا نام نہاد زکوٰۃ سسٹم جاری کیا گیا ہے جس کے نتیجے میں گداگر گھٹے نہیں کچھ اور ہی بڑھ گئے ہیں۔ مگر روسی نظام کا یہ پہلو ہرحال لائق تحسین ہے کہ ملک کے طول و عرض میں ایک بھی گدا گر باقی نہیں ربا۔ ’’خذماصفادعماکدور‘‘ (اچھی چیز کو لے لو اور خراب کو چھوڑ دو) کے مصداق دنیا بھر میں کہیں بھی اگر کوئی اچھی چیز نظر آتی ہے تو اس سے استفادہ کرنا ہماری دینی تعلیمات کا حصہ ہے۔ آنحضورؐ نے فرمایا ہے کلمہ حکمت (اچھی بات) مومن کی گمشدہ متاع ہے وہ اسے جہاں بھی دیکھتا ہے۔ اُسے حاصل کر لیتا ہے۔ کریملن میں ایک میوزیم بھی دیکھا یہ زار شاہی کے خزانوں اور ان کے ٹھاٹھ باٹھ کو محفوظ رکھنے کے لئے قائم کیا گیا ہے تاکہ آنے والی نسلیں ان بادشاہوں کی سرفانہ اور عیاشانہ زندگی دیکھیں اور موجودہ عوامی دور سے اس کا تقابل کر سکیں۔یہاں ہیرے، یاقوت، الماس دیکھ کر آنکھیں خیرہ ہو جاتی ہیں۔ اربوں روپے کی مالیت کے تاج اور زیورات یہاں انتہائی کڑے پہرے میں شو کیسوں میں سجے ہوئے ہیں۔جہاں ترجمان آپ کو ان کی خصوصیات، ان کی تاریخ اور ان کی مالیت وغیرہ سے آگاہ کرتے جائیں گے۔ایک ہیرا دیکھا جس کا وزن تین سو بیالیس کیرٹ کا ہے۔کالا ہیرا سنا تھا مگر دیکھنے میں یہاں آیا۔شاہی خاندان کے پلنگ، استعمال کے برتن اور ملبوسات بھی محفوظ ہیں جنہیں دیکھ دیکھ کر بادشاہوں کی ہوس کا اندازہ ہوتا ہے۔وہ فوج یقینا کسی نظریے کی قوت سے سرشار ہوگی جس نے یہ سب کچھ پایا اور خود سمیٹنے کی بجائے اسے قومی فرمانے میں جمع کرا دیا۔لنچ پر میں پھل کھانا چاہتا تھا۔یہاں کے کھانے میرے ذوق کے نہیں ویسے بھی میں طبیب ملت حضرت حکیم محمد سعید دہلوی کے دن میں ایک کھانے کے نعرے پر عمل پیرا ہوں یہ الگ بات ہے کہ وہ ڈنر کے حق میں ہیں۔ لنچ کو اڑا ادینا چاہتے ہیں، میں لنچ رغبت سے کھاتا ہوں، ڈنر پر صرف پھل کھاتا ہوں۔مگرنظریہ ضرورت کے تحت اکثریہ ترتیب الٹ بھی جاتی ہے۔ ہمارے ہاں (اور بیرون ملک بھی) ڈنر کی دعوتوں کا زیادہ رواج ہے ان میں جانا پڑ جائے تو ڈنر کی خاطر لنچ چھوڑنا پڑتا ہے۔ یہاں بھی یہی ہوا، رات کا کھانا پاکستانی سفیر کے ہاں کھانا تھا (اور یہ بھی لالچ تھی کہ یہاں پاکستانی کھانے کھانے کو ملیں گے اس لئے لنچ پر پھل کھانے کو جی چاہ رہا تھا) ماسکو میں ایک پرائیویٹ مارکیٹ ہے یہاں کسان اپنی پیداوار کا سرکاری ٹارگٹ پورا ہو جانے کے بعد اپنی فاضل فصل بیچنے کے مجاز ہیں۔نرخ یہاں دوسری سرکاری مارکیٹوں کے بالمقابل کچھ زیادہ ہیں مگر چیز بڑی سلیقے کی ملتی ہے۔ ہمارے سفیر صاحب نے بھی بتایا کہ اکثر ڈپلومیٹ صاحبان یہیں سے خرید و فروخت کرتے ہیں۔یہاں وسطی ایشیا کے خوبصورت، نفیس لذیز اور رس دار پھل دیکھے تو طبیعت جھوم اٹھی۔ اس خالق و پروردگار نے انسان کے لئے کیا کیا نعمتیں پیدا کی ہیں یہی پھل (اور اسی نام کے پھل) دوسرے ملکوں میں بھی ہیں مگر ان پھلوں کی بات ہی دوسری ہے۔ میں نے ایک گرما، کچھ انگور، کچھ ناشپاتیاں اور دو چار آڑو منتخب کئے۔ ایک سفید ریش بابا جی اپنی بیوی کے ساتھ اسٹال پر کام کر رہے تھے قیمت دینے کی باری آئی تو انہوں نے فارسی زبان میں پوچھا ’’از کجا ہستید‘‘ (کہاں کے رہنے والے ہو) میں نے کہا '' از پاکستان ہستم ’’ (پاکستان سے ہوں)‘‘ ما از تاجکستان ہستم والحمدللہ کلمہ گو ہستیم ’’ شما مہمان ہستید از ما بطور ہدیہ قبول بفرمائید ‘‘ (ہم تاجکستان سے ہیں اور خدا کا شکر ہے کہ کلمہ گو ہیں، اور آپ ہمارے مہمان ہیں اسے تحفے کے طور پر قبول فرمائیے) یہ گو یا سنٹرل ایشیا کی طرف میرے سفر کا خوشگوار نکتہ آغاز تھا۔ یہ میرے محسن حضرت مولانا کوثر نیازی کی کتاب (سفر نامہ) ’’کوہ قاف کے دیس میں‘‘ کی تحریر ہے۔روس کے سفر نامے کو انہوں نے انتہائی خوبصورت انداز میں پیش کیا۔ویسے بھی مولانا کی کسی کتاب کا مطالعہ شروع کر دیں تو وہ قاری کو اس طرح ساتھ لے کر چلتے ہیںکہ جب تک کتاب ختم نہ ہو جائے قاری کتاب کو چھوڑ نہیں سکتا۔میرے ساتھ مولانا کوثر نیازی کا ایسا رشتہ رہا کہ میں اب بھی سمجھتا ہوں کہ اگر مولاناصاحب میری زندگی میں نہ آتے تو شاید میں آج کچھ بھی نہ ہوتا۔انہوں نے انگلی پکڑ کر مجھے لکھنا پڑھنا اور تقریر کرنا سکھایا۔مولاناصاحب بے پناہ خوبیوں کے مالک تھے۔مکالمے کے ماہر تھے وہ پاکستان کے واحد سیاست دان تھے جو بیک وقت سیاست دان، شاعر، دانشور، صحافی، مصنف، ادیب، خطیب اور چوٹی کے عالم دین تھے۔وہ دوستوں کے پکے دوست تھے۔مجھے ان کی صحبت اور شاگردی پر ہمیشہ فخر رہے گا۔آج 19 مارچ 2023 ء کو ان کی 29 تیسویں برسی ہے۔آئیں آپ سب میرے ساتھ مل کر ان کی مغفرت کے لئے دعا کریں۔اللہ تبارک تعالیٰ ان کی تمام خامیوں، غلطیوں اور گناہوں کو معاف فرما کر ان کو جنت الفردوس میں جگہ عطا فرمائے۔آمین سب دوست چھوڑے جا رہے ہیں آج کل ہمیں اے زندگی تجھے بھی اجازت ہے، جا عیش کر