اس رپورٹ کے مطابق چین اور روس کی باہمی تجارت ساڑھے 16 ارب ڈالر ہے اور دونوں ممالک اسے تیزی کے ساتھ ڈالر سے یوآن اور روبل میں منتقل کر رہے ہیں ،ایک اور بڑے امریکی اخبار دی وال اسٹریٹ جرنل کی رپورٹ میں بتایا گیا ہے سعودی عرب کی تیل و گیس کی کل پیداوار کا 25 فیصد چین خریدتا ہے اور اس کی ادائیگی بھی ڈالر سے یوآن میں تبدیل کر نے کیلئے جاری مذاکرات اپنے حتمی مراحل میں داخل ہوگئے ہیں ۔ یاد رہے کہ 1974ء میں امریکہ کی نکسن حکومت کے ساتھ ایک معاہدے کے تحت سعودی عرب کو پابند کر دیا گیا تھا کہ وہ اپنا تیل اور گیس صرف امریکی ڈالر میں بیچے گا ، اس کے بدلے میں امریکی فوج نے سعودی عرب کی سکیورٹی کی گارنٹی دی ، یہ سلسلہ پھر تمام اوپیک ممالک تک پھیل گیا اور ڈالر کو پیٹرو ڈالر کہا جانے لگا ۔تہران ٹائمز نے لکھا ہے کہ دنیا کے تیل و گیس کے 40 فیصد ذخائر روس ، ایران اور وینزویلا کے پاس ہیں اورتینوں ممالک نے فیصلہ کر لیا ہے کہ وہ اپنا تیل و گیس امریکی ڈالر کی بجائے روبل اور یوآن میں بیچیں گے ، جس روز سعودی عرب اور اوپیک ممالک نے بھی اپنا تیل صرف امریکی ڈالرکی بجائے ریال ، درہم ، یوآن اور یورو میں بھی بیچنا شروع کر دیا وہ پیٹرو ڈالر کی عالمی شہنشاہیت کا آخری روز ہوگا ، اس کے بعد بھی ڈالر بلا شبہ عالمی اکانومی کا سب سے بڑا بادشاہ رہے گا لیکن اس کی شہنشاہیت ضرور ختم ہوجائے گی اور یوآن ایک نئی ابھرتی ہوئی بادشاہت بن کر سامنے آ کھڑا ہو گا ۔ 2018 ء سے جب سے چین نے تیل و گیس کی خریداری ڈالر کی بجائے یوان میں کرنے کا سلسلہ شروع کیا ہے ، دنیا کے مختلف ممالک میں چینی یوآن کے اندر اپنے عالمی فارن کرنسی ریزروز رکھنے کا رحجان بڑھنے لگا ہے ، پیٹرو ڈالر کی شام ، پیٹرو یوآن کی صبح کے معنی خیز عنوان کے ساتھ شائع یونے والی فوربز کی تازہ ترین رپورٹ میں انکشاف کیا گیا ہے کہ سن2000 ء میں دنیا کے مختلف ممالک کے کل فارن کرنسی ریزروز کا 74 فیصد امریکی ڈالر میں تھا جو کم ہو کر 2023ء میں 60 فیصد پرآگیا ہے اور مسلسل مزید کم ہوتا جا رہا ہے ، جبکہ عالمی فارن کرنسی ریزروز میں یوآن کا شیئر 2017 ء میں صرف ایک فیصد تھا جو 2023 ء میں 3 فیصد کے قریب ہوگیا ہے اور مسلسل بڑھ رہا ہے ۔ معروف عالمی خبر رساں ادارے رائٹرز کی ایک انویسٹی گیٹو رپورٹ میں انکشاف کیا گیا ہے کہ پیوٹن سرکار سے سستا تیل لینے کے دوران بھارت نے خفیہ طور پر پہلے روس کو اماراتی درہم میں ادائیگیاں کیں اور پھر براہ راست روبل میں پے منٹ کرنا شروع کر دی ، اس مقصد کیلئے پہلے خفیہ طور پر متحدہ عرب امارات کے بینکنگ سسٹم کو استعمال کیا گیا اور پھر روس اور بھارت کے بینکوں کے درمیان براہ راست روبل میں ٹرانزیکشنز کا سلسلہ شروع کر دیا گیا ۔ (جاری ہے)