دونوں جماعتوں نے نہ صرف یہ کام نہ کیا بلکہ انہوں نے نیب قانون میں ایسی ترامیم کیں جن سے ایک طرف نیب کا ادارہ کمزور ہوگیا تو دوسری طرف احتساب کے مقدمات حکومت کے تحت کام کرنے والوں اداروں ایف آئی اے ‘ پولیس اور اینٹی کرپشن اسٹیبلشمنٹ کو منتقل کیے جانے لگے۔ یہ صورتحال احتساب کے نظام کو دفن کرنے کے مترادف تھی۔ عدالت عظمی نے نیب ترامیم کو کالعدم قرار دے کر ملک میں احتساب کے نظام کو زندہ رکھنے کی سعی کی ہے جو نہایت قابل تعریف ہے۔ نیب قانون میں یقینا خامیاں ہیں جن میں سے ایک ملزم کا90 روزہ ریمانڈ ہے۔ ان خامیوں کو دور کرکے ایک بہتر نیب لاء متعارف کروایا جاتا تو اس کی تحسین کی جاتی لیکن جو ترامیم لائی گئیں ان سے یہ تاثر گہرا ہوا کہ مسلم لیگ ن اور پیپلز پارٹی سمیت پی ڈی ایم میں شامل جماعتیں احتساب کے ادارے سے وہ اختیار چھیننا چاہتے ہیں جو ان کی گرفت کا باعث بن سکے۔ یہی وجہ ہے کہ نیب ترامیم کے بعد نواز ‘ شہباز ‘ زرداری‘ گیلانی سمیت بیشتر قائدین کو نیب سے چھٹکارا مل گیا بعض کے مقدمات ختم ہوگئے اور بعض کے مقدمات ایف آئی اے اور اینٹی کرپشن ادارے کو بھیج دیئے گئے۔ عدالت عظمی کے فیصلے کے بعد یہ مقدمات اب دوباہ نیب کے دائرہ اختیار میں آگئے ہیں۔ نیب ترمیمی ایکٹ2022 ء کے خلاف چیئرمین تحریک انصاف نے عدالت عظمی سے رجوع کیا تھا۔ یہ نیب قانون میں پہلی ترمیمی قانون سازی تھی۔ بعد ازاں دوسرا ترمیمی ایکٹ2022 ء لایا گیا جس کی سیکشن3 انتہائی متنازعہ تھی۔ عدالت عظمی کے فیصلے کے مطابق اس ترمیم نے منتخب نمائندوں کو احتساب کے دائرے سے یکسر باہر نکال دیا ہے۔ کوئی اور ادارہ ایسا نہیں ہے جو ان کی بدعنوانی کو احتسابی نیٹ میں لاسکے‘ عدالت عظمی نے اس بنا پر قرار دیا کہ اس طرح منتخب نمائندوں کی بدعنوانی کو مکمل تحفظ دینے کا مطلب آئین کے آرٹیکل14,9,23 اور24 کی صریحاً خلاف ورزی ہے۔ عدالت کے فیصلے کی رو سے اس قانون سازی نے آئین کے آرٹیکل25 کی بھی خلاف ورزی کی ہے جو تمام شہریوں کے درمیان بلاتفریق یکساںبرتائو و سلوک کی بات کرتا ہے۔ آئین کے آرٹیکل62(1)F بھی کہتاہے کہ منتخب نمائندے صادق و امین ہونے چاہئیں جبکہ انہیں کسی قسم کی بدعنوانی سے تحفظ فراہم کرنے کا مطلب آئین سے انحراف کے مترادف ہوگا۔ اس تناظر میں سپریم کورٹ نے نیب قانون میں کی گئی ترامیم کو کالعدم قرار دے کر ایک تاریخی فیصلہ دیا ہے۔