ماہرین نے مارچ اور اپریل میں ریکارڈ گرمی پڑنے کے بعد پاکستان اور بھارت کیلئے وارننگ جاری کر دی ہے۔ جیو نیوز کی رپورٹ کے مطابق موسمیاتی ماہرین نے بدترین اور طویل ہیٹ ویو آنے کے باعث پاکستان اور بھارت میں ہزاروں ہلاکتوں کا خدشہ ظاہر کیا ہے۔ موسمیاتی ماہرین کے مطابق ابھی سال کے سب سے گرم ترین مہینوں کی آمد ہونا باقی ہے، گرم ترین مہینوں میں بدترین ہیٹ ویو آ سکتی ہے جس کا دورانیہ بھی طویل ہو سکتا ہے۔ اس ممکنہ ہیٹ ویو کے باعث ہزاروں افراد کی اموات کا خدشہ ہے، خاص کر بزرگ افراد کے متاثر ہونے کا سب سے زیادہ خدشہ ہے۔ دوسری جانب بی بی سی اردو کی رپورٹ میں پاکستان میں جاری قیامت خیز گرمی کی لہر کے حوالے سے تشویش ناک انکشاف کیا ہے۔ بی بی سی اردو کی رپورٹ کے مطابق محکمہ موسمیات نے اپریل 2022 کو گزشتہ 62 سالوں کے دوران ملکی تاریخ کا گرم ترین اپریل قرار دیا ہے۔ بتایا گیا ہے کہ محکمہ موسمیات پاکستان کے مطابق اس برس اپریل کا ماہ سنہ 1961 کے بعد سب سے گرم ترین ماہ رہا۔ مارچ اور اپریل کے ماہ اوسط سے تقریباً پانچ ڈگری زیادہ گرم رہے۔ ماہرین ماحولیات اوسط سے پانچ ڈگری زیادہ رہنے کو انتہائی بڑا خطرہ سمجھ رہے ہیں۔ جبکہ محکمہ موسمیات کی اپریل 2022 کی موسمیاتی جائزہ رپورٹ کے مطابق ملک میں اپریل کا مہینہ نئے موسمی ریکارڈز بنا کر گزرا۔ اپریل ملکی تاریخ کا دوسرا خشک ترین مہینہ رہا، ملک میں معمول سے 74 فیصد کم بارشیں ہوئیں، پنجاب، سندھ اور بلوچستان میں کوئی قابل ذکر بارش رپورٹ نہیں ہوئی، پنجاب میں معمول سے 89 فیصد کم بارشیں ہوئیں، خیبرپختونخوا میں 79 فیصد، بلوچستان میں 78فیصد، آزاد جموں و کشمیر میں 56 اور گلگت بلتستان میں 51 فیصد معمول سے کم بارشیں ہوئیں۔ دوسری جانب محکمہ موسمیات نے آئندہ ہفتے کے دوران ملک میں شدید گرمی کی پیشگوئی کی ہے ۔محکمہ موسمیات کے مطابق بالائی پنجاب، کے پی،اسلام آباد، جی بی اور آزاد کشمیر میں درجہ حرارت معمول سے 9 ڈگری زیادہ رہنے کا امکان ہے۔محکمہ موسمیات کے مطابق بالائی وسطی سندھ، وسطی جنوبی پنجاب کا درجہ حرارت معمول سے 8 ڈگری زیادہ ہوسکتا ہے۔بلوچستان میں بھی درجہ حرارت معمول سے 8 ڈگری سینٹی گریڈ زیادہ رہنے کا امکان ہے۔محکمہ موسمیات کے مطابق شدید گرمی اور خشک موسم کے باعث فصلوں اور باغات کو پانی کی کمی کا خطرہ ہے، زیادہ درجہ حرارت کے باعث بجلی کی کھپت بھی بڑھ جائے گی۔ذرائع موسمیات نے بتایا ہے کہ اگلے ہفتے گرمی بڑھنے سے دریاؤں میں پانی کے بہاؤ میں اضافے کا امکان ہے۔